Кыргызстан менен Россия саламаттыкты сактоо тармагындагы кызматташтыкты бекемдөөдө. Бул тууралуу Саламаттык сактоо министрлигинен билдиришти.

Бүгүн Бишкекте соода-экономикалык, илимий-техникалык жана гуманитардык кызматташуу боюнча орус-кыргыз өкмөттөр аралык комиссиясынын жыйынынын алкагында Кыргызстан менен Россиянын Саламаттык сактоо министрликтеринин ортосундагы консультациялар өттү.

Саламаттык сактоо министри Эркин Чечейбаев менен РФ саламаттык сактоо министринин орун басары Андрей Плутницкий калк саламаттыгын коргоо жаатында эки тараптуу кызматташуунун учурдагы абалын жана келечегин талкуулашты.

Ошондой эле кызматташтыктын төмөндөгүдөй негизги багыттары талкууланды: 

• Семашко мектебинин базасында эки өлкөнүн саламаттык сактоо системасын шайкеш келтирүү;
• медициналык жардамдын жаңы түрлөрүн өнүктүрүү;
• Евразия экономикалык биримдигинин алкагында дары-дармек жана медициналык буюмдар рыногун жөнгө салуу маселелери боюнча координация;
• медициналык буюмдардын сапатын көзөмөлдөөнү күчөтүү;
• Кыргызстан менен Россиянын алдыңкы медициналык мекемелеринин кесиптик жана илимий өз ара аракеттенүүсүн кеңейтүү.

Консультациялардын жүрүшүндө Эркин Чечейбаев эки өлкөнүн кызматташтыгын өнүктүрүүгө багытталган бир катар демилгелерди сунуштады. Негизги сунуштардын бири Бишкек шаарында буга чейин ийгиликтүү иштеп жаткан кыргыз-түрк ооруканасынын үлгүсүндө иштей турган Кыргыз-орус достугу ооруканасынын курулушу болду.

"Мындай борбордун түзүлүшү сапаттуу медициналык жардамдын жеткиликтүүлүгүн гана жогорулатпастан, Россиянын алдыңкы клиникаларынын катышуусунда кыргызстандык адистерди даярдоо аянтчасына айланат", - деп баса белгиледи Эркин Чечейбаев.

Мындан тышкары, кыргыз тарап медициналык мекемелердин ортосунда тажрыйба алмашуу жаатында кызматташууну активдештирүүнү, Евразия экономикалык биримдигинин алкагында дары-дармектерге көз салуу маселелери боюнча биргелешкен ишти күчөтүүнү жана россиялык адистердин катышуусу менен медициналык кадрларды даярдоо боюнча программаларды иштеп чыгууну сунуштады.

КР Саламаттык сактоо министрлиги жетишилген макулдашуулар медицина жана илим тармагындагы кызматташтыкты мындан ары өнүктүрүү үчүн бекем негиз болуп каларынан күмөнү жок.